السلام وعليكم ورحمة الله وبركاته
ازيكم يا أحلى أخوات فى الله
بالنسبة للأسم فهى الفراخ المصريه التوتى المقلية عشان الأصلى مصرى مش أمريكى
بصوا بقى هانبتدى بقائمة الأسعار عشان نبقى على نور ومحدش يزعل
الطبق 7 قطع فراخ وبطاطس محمر و3 كيذر ب60 دعوة بصلاح الحال ورضا الله والسعر شامل الكنز والكول سلو 
طبق الريزو ب 10 دعوة بهداييييييييية أولادى وأولاد المسلمين ها ايه رأيكوا اشرح ولا بلاش ...لأهاشرح
أولا طريقة الكنتاكى بسيطة ازاى هانجيب فرخة مقطعة بالكمية اللى انتى عايزاها (الفرخة اللى فوق دى ثلاث أرباع فرخة )وبعدين
بتبليها بشطة كتيرة تحقن فى العضم كويس وبابريكا وتوضع فى لبن رايب 4
ساعات فى الثلاجة وتخرج توضع فى 2ملعقة ملح وملعقة سكر و2ملعقة ثوم بودر
و1ملعقة بصل بودر وفلفل أسود حب و1ملعقة جنزبيل فرش و4حبات قرنفل و4 ورقات
لورا فى ميه مثلجة وتدخل الثلاجة تانى 4 ساعات وبعد كده تخرج لتتبل وتحمر
دى كلها الطريقة المستخدمة فى محلات كنتاكى
أنا بقى عدلت فيها شوية يعنى عملت الفراخ
شوربة عادى بالزبدة و2فص حبهان ومستكة وورق لورا ونصف بصلة وسويتها تلات
أرباع سوى وأضفت للشوربة القرنفل والفلفل الأسود والجنزبيل الفرش والملح
و2ملعقة كبيرة عسل أسود وهاقولكوا ليه
يا رب تكون الصور
واضحة وأنا سبت المصفى وفيها الأضافات عشان تعرفوها ومعاها الفراخ المسلوقة
والطبق التالت فيه صدر نيئ متبل فى اللبن الرايب والتوابل اللى فوق ونسيب الفراخ فترة ترتاح وبعدين نيجى للشوربة اللى صفيناها عشان نعمل الريزو
هانجيب نصف البصلة الأخر ونقطعه شرائح و2فص ثوم مفروم ونشوحهم لحد ما رائحة الثوم والبصل تطلع مش يتحمروا ونضيف الرز ونقلب شوية وبعدين الشوربة عليه ومعاه ملعقة صلصة ونسيبه يستوى
أما العسل الأسود عشان يدى لون الرز المميز
نرجع بقى للجزء المهم وهو تحضير قرمشة الفرخة هانجيب طبق وفيه الدقيق وعليه البهارات بصل بودر +ثوم بودر +بابريكا +زعتر + بردقوش +جنزبيل بودر أو ممكن تضيفى بدل كل اللى فات ده كيس فيجيتار
وننقط فى الدقيق المتبل نقط ميه مثلجة
ونفركها بأيدينا لحد ما تعمل حتت عجين صغيرة 
وبعدين نجيب طبق تانى ومنخل أو مصفى وننخل الدقيق ونجمع الدقيق المتكون فيكون القرمشة اللى على وش الفراخ 
ونعمل معاها التمبورة اللى هى دقيق مدوب فى الماء المثلج بس يكون تقيل مش خفيف يعنى كميه الدقيق ضعف الماء المثلج ودى صورتهم 
ودى صورة الفراخ بعد ما حطيتها فى التمبورة الاول وبعدين فى الدقيق المقرمش 
وبعدين نحمرها فى القلاية أو فى المقلاية بس بزيت غزير وسخن وأهم حاجة بعد التحمير نلف الفراخ كويس فى كيس ومتغطى بفوطة عشان الفراخ ما تنشفش و تجلد 
وبعد كده نقدمها اتفضلوا 
وده الساندوتش والصدر البانيه مع الخس وقطع الطماطم وصوص المميز 
ها قولولى حد هايشترى ويدفع ولا .............. أنا باستنى أهو 
لو حد عايز أى استفسار يسأل أ نا معاكوا لأخر وسلام يا قمرات
الإثنين مارس 15, 2021 11:07 am
